Matthew 15

Okuhlanzekileyo Lokungahlanzekanga

1Ngalesosikhathi abanye abaFarisi labafundisi bomthetho beza kuJesu bevela eJerusalema bambuza bathi,

2“Kungani abafundi bakho besephula isiko labadala na? Kabagezi izandla zabo nxa bengakadli!”

3UJesu waphendula wathi, “Kungani lina lisephula umlayo kaNkulunkulu ngenxa yamasiko enu na? 4Phela uNkulunkulu wathi, ‘Hlonipha uyihlo lonyoko’ njalo ‘Yilowo owethuka uyise loba unina ufanele abulawe.’

5Kodwa lina lithi nxa umuntu esithi kuyise loba kunina, ‘Loloncedo ongabe uluzuzile kimi yisipho esiqanjulelwe uNkulunkulu;

6kasamelanga ‘ahloniphe’ uyise ngaso. Ngaleyondlela liyachitha ilizwi likaNkulunkulu ngenxa yesiko lenu. 7Lina bazenzisi! u-Isaya wayeqondile aze aphrofethe ngani athi:

8“Lababantu bangihlonipha ngezindebe zabo, kodwa izinhliziyo zabo zikhatshana kwami.

9Bangikhonza ngeze; izimfundiso zabo yimithetho kuphela efundiswa ngabantu.”

10UJesu wabizela ixuku labantu kuye wathi, “Lalelani lizwisise. 11Lokho okungena emlonyeni womuntu ‘kakumngcolisi’ kodwa lokho okuphuma emlonyeni wakhe yikho ‘okumngcolisayo.’

12Abafundi basebesiza kuye bambuza bathi, “Uyakwazi yini ukuthi abaFarisi kubakhubile ukuzwa lokhu?”

13Waphendula wathi, “Zonke izihlahla ezingahlanyelwanga nguBaba osezulwini zizasitshunwa lezimpande zazo. 14Bayekeleni; ngabakhokheli abaphumputhekayo. Nxa impumputhe ihola impumputhe bobabili bazawela emgodini.”

15UPhethro wathi, “Sichasisele umzekeliso lowo.”

16UJesu wababuza wathi, “Lilokhu lingelakuzwisisa na? 17Kaliboni yini ukuthi noma yini engena emlonyeni iya esiswini besekuphuma emzimbeni? 18Kodwa lezozinto eziphuma emlonyeni zivela enhliziyweni, yizo ezenza umuntu ‘angcole.’ 19Ngokuba enhliziyweni kuphuma imicabango emibi, ukubulala, ukufeba, ukuphinga, ubusela, ukufakaza amanga lokunyeya. 20Lezi yizo ezenza umuntu ‘angcole;’ kodwa ukudla ngezandla ezingagezwanga kakumenzi ‘angcole.’ ”

21Esuka kuleyondawo uJesu waya emmangweni waseThire leSidoni.

22Umfazi ongumKhenani owaleyondawo weza kuye ezokhala esithi, “Nkosi, Ndodana kaDavida, ake ungihawukele! Indodakazi yami ithwele nzima itshukunyezwa ngamadimoni.”

23UJesu kazange amphendule. Ngakho abafundi bakhe beza kuye bamkhuthaza bathi, “Mxotshe, nangu uselokhu ememeza esilandela.”

24Waphendula wathi, “Ngathunywa kuphela ezimvini ezilahlekileyo zako-Israyeli.”

25Owesifazana lowo weza waguqa phambi kwakhe wathi, “Nkosi, ake ungisize.”

26Waphendula uJesu wathi, “Kakulunganga ukuthatha isinkwa sabantwana usiphosele ezinjeni zabo.”

27Owesifazana wathi, “Yebo, Nkosi, kanti angithi izinja ziyayidla imvuthu ewa etafuleni labaninizo.”

28UJesu wasephendula wathi, “Mfazi, ulokholo olukhulu! Isicelo sakho sesamukelwe.” Indodakazi yakhe yahle yasila ngasonaleso isikhathi.

UJesu Usuthisa Izinkulungwane Ezine

29UJesu wasuka lapho wehla egudlana loLwandle lwaseGalile. Wasekhwela entabeni wahlala phansi. 30Kweza kuye amaxuku amakhulu abantu beletha abaqhugezayo, iziphofu, izigoga, izimungulu labanye abanengi bababeka phambi kwakhe; wabasilisa. 31Abantu bamangala ukubona izimungulu sezikhuluma, izigoga seziphila, abaqhugezayo sebezihambela leziphofu sezibona. Bamdumisa uNkulunkulu ka-Israyeli.

32UJesu wabiza abafundi bakhe wathi, “Ngilesihawu ngalaba abantu; sebehlale lami izinsuku ezintathu bengadlanga lutho. Angithandi ukubachitha belambile, funa bayathe ezindleleni.”

33Abafundi bakhe bamphendula bathi, “Singasithatha ngaphi isinkwa esaneleyo endaweni esesikhaleni kangaka ukuba sisuthise ixuku elingaka na?”

34UJesu wabuza wathi, “Lilezinkwa ezingaki?” Bathi, “Eziyisikhombisa lezinhlanzi ezincane ezimbalwa.”

35Wasetshela ixuku labantu ukuba bahlale phansi. 36Wasethatha lezozinkwa eziyisikhombisa lezinhlanzi, kwathi esebongile, wazihlephula waziqhubela abafundi, labo bazinika abantu. 37Bonke badla basutha. Ngemva kwalokho abafundi babutha imvuthu kwagcwala izitsha eziyisikhombisa.

38Inani lalabo abadlayo laliyizinkulungwane ezine, ngaphandle kwabafazi labantwana.

39UJesu eselichithile ixuku labantu, wangena esikepeni waya emmangweni waseMagadani.